قصيدة بالأم روووعة...
--------------------------------------------------------------------------------
الله يومك صغير لو تذكرها
كنت اصغر عيالها و اكبر امانيها
كنك مراية لها لو ما تناظرها
ما كحلت عينها و لا حنت ايديها
مرت عليها ليالي ما تصورها
لو قلت ما قلت ما صورت ماضيها
و تحملت من همومك في خواطرها
من وين ما رحت ولا جيت ماليها
من اول الخطوة اللي في تعثرها
حتى آخر الخطوة اللي تو ماشيها
تسقيك منها و تلعب في ظفايرها
الين تروى عروقك من سواقيها
و ان نامت الليل صحت لك مشاعرها
تخاف تحتاجها ولا تناديها
كانت تحطك بيدها مثل اساورها
و لو لحظة غبت عنها باح خافيها
كم لعبة قد شرتها و انت تكسرها
و مرة ثانية ترجع و تشريها
تقدر على كل شي بس خاطرها
ما يحتمل دمعة في عين غاليها
ما تذكر دروسك اللي ما تذاكرها
و خوفها و انت وسط البيت ترميها
بشرتها بالنجاح و هل ناظرها
يا دمعة للفرح سيلي و ظنيها
كم ليلة غبتها و ابطيت ساهرها
نامت و قامت و خافت من تواليها
تجلس ورا الباب و تقلب ستايرها
و تذوي مثل شمعة بالبيت ناسيها
تذوب و تجفف الدمعة على آخرها
يا خوفي انك على هالحال تنهيها
ما هيب حمل السهر حتى تسهرها
اليوم شابت و حق انك تراعيها
ما هوب حق عقب هالعمر تنهرها
ما دام حتى ربك قايل فيها
اخفض لها من جناح الذل و اشكرها
لا تطير عنها و ريشك حطت ايديها
و الا تزوجت خذ بنت تقدرها
تبر فيها مثل برك و تغليها
حتى لو الزوجة اخطت دون خاطرها
و سوت لها حاجة ماهيب ترضيها
و الا حذفت كلمة تجرح مشاعرها
او عاملتها بنفس ما تراعيها
حتى لو امك ما قالت وش يكدرها
عشان خاطرك و شالت جرحها فيها
قل يا مره هذي امي في ضمايرها
شي و لا بدها تقول و مانيها
و لا يكدرني الا اللي مكدرها
ولا يعنيني الا اللي يعنيها
وش لون ابصبر على اللي ما يقدرها
الله لا يخلي ترابي من مواطيها
وصية الله علية ما تنكرها
اول حقوقي و ثالثها و ثانيها
و الزوجة اللي على المعروف اعاشرها
ان ما عرفت حقها والله لا اخليها
ما نيب من يترك امه ما يشاورها
يتبع رضا زوجته و الام ناسيها
وصية قلتها للي تذكرها
الوالدة كلمة صعب معانيها
هي سلعة الله و خير الناس تاجرها
يقول له قولة بالحق موفيها
يا اللي عيونك على الجنة تناظرها
طلبك غالي و لكن تحت رجليها
أحبكم
الإثنين أبريل 28, 2008 5:23 am
